ភ្នំពេញ៖ អនុប្រធានទី១ អាជ្ញាធរមីន និងប្រធានសហព័ន្ធកីឡាបាល់បោះរទេះជនពិការកម្ពុជា លោក លី ធុជ បានស្នើឱ្យជប៉ុនជួយគាំទ្ររទេះរុញប្រកួតរបស់ជប៉ុន ឧបត្ថម្ភក្រុមអត្តពលិកនៅខេត្តសៀមរាប និងសាងសង់ដំបូលរោងនៅសាលាខេត្តបាត់ដំបង និងសាងសង់ទីលាននៅខេត្តសៀមរាប ដើម្បីសម្រួលឱ្យក្រុមកីឡាករត្រៀមខ្លួនប្រកួតស៊ីហ្គេម និងអ៊ាសានប៉ារ៉ាហ្គេមនៅខែឧសភា ខាងមុខនេះ។

លោកបានលើកឡើងនូវសំណើនេះក្នុងឱកាសដែលលោកទៅចូលរួមក្នុងពិធីជូនដំណើរក្រុមអត្តពលិកកីឡាការិនីបាល់បោះរទេះជនពិការកម្ពុជាចំនួន ១៥រូបទៅចូលរួមកម្មវិធីផ្លាស់ប្តូរយុវជន JENESYS ២០២២ នៅស្ថានទូតជប៉ុនប្រចាំកម្ពុជានារសៀលថ្ងៃទី១០ ខែកុម្ភៈ ឆ្នាំ២០២៣។

ពាក់ព័ន្ធនឹងសំណើនេះ ឯកអគ្គរាជទូតជប៉ុនប្រចាំកម្ពុជាថ្មី លោក អ៊ុអិណុ អាត្សឹស៊ី (UENO ATSUSHI) បានលើកឡើងថា ឥឡូវនេះស្ថានទូតជប៉ុនមិនទាន់អាចឆ្លើយតបនឹងសំណើនេះបានភ្លាមៗនៅឡើយទេ ដោយសារត្រូវតែមានការពិភាក្សាគ្នាបន្ថែមទៀតជាមួយនឹងក្រសួងការបរទេសជប៉ុន ហើយលោកអះអាងថានឹងយកសំណើនេះទៅជម្រាបជូនក្រសួងការបរទេសជប៉ុន៕